香港地發達容易，搵食艱難，不過只要有辦法，兩餐溫飽都唔係太難嘅事。網友發揮互助自救精神，喺facebook發起「食窮民建聯」群組，呼籲全港網民報料左派社團最新賣大包、益街坊情報，深信「有民建聯，香港就唔會有人餓死。」
想衣食無憂勿撐左派
呢個群組目前有幾百人加入，發起人歡迎網民隨時提供左派最新益街坊活動，好似海鮮餐、齋宴等，必須列出報名詳情，方便大家攞着數，獨食難肥咁話。八方上網所見，大家報料頗為踴躍，最新鮮滾熱辣着數係民建聯大埔區議員有專車送街坊去會展書展，成人12蚊，學生、小童價8蚊，平過自行搭公共交通工具；另一優惠情報係蔡素玉提供10蚊影20張證件相。
其實呢個群組係秉承上年「食窮民建聯，票投社民連」精神，按照網民理論，若要長期搵左派着數，日後衣食無憂，香港人必須繼續唔好投票畀民建聯，事關民建聯輸得越慘烈，左派就越需要大灑金錢爭取民心，民建聯得票越少，蛇宴菜式就越豐富，平價旅行團就越多，精明嘅香港人，識做啦。