行政會議成員梁智鴻、婦產科大國手李健鴻、港大醫學院前院長楊紫芝，都係當今醫學界響噹噹嘅名字，但噚日竟然變回學生一齊緬懷恩師。名醫嘅師傅梗唔簡單，就係中國近代病理學先驅侯寶璋教授（1894-1967），侯教授做過港大醫學院病理系主任，所著嘅《實用病理組織學》係中國第一部病理組織學用書。佢退休後接受已故總理周恩來邀請，1961年返北京出任當時中國醫科大學副校長。
楊紫芝噚日喺《侯寶璋家族史》新書發佈會話，做人不應為五斗米折腰，但佢以前每經過侯教授辦公室門口，都會鞠躬問好，「因為教授令人肅然起敬。」李健鴻醫生講笑話最記得侯教授，「佢係第一個Departmenthead請學生食飯。」梁智鴻自言學藝不精，侯教授同佢講，「你唔好做病理學家，你咁蠢做外科醫生啦。」
侯家喺醫學界好顯赫，侯寶璋第四子侯勵存醫生都係出色病理學家。勵存抱恙，噚日要「請假」出院現身發佈會，佢話父親家訓係寧人負我，莫我負人。