講過N次第N屆都唔參選特首嘅梁振英CY，近排四出約人飲茶食飯聽意見，參選意向甚為明顯，亦冇再講「第N屆都唔參選」呢句話，反而話遲啲先講，金融服務界議員詹培忠個幾月前同CY飲過茶，老詹透露CY自解N屆不參選呢個香港政圈其中一個最大謎團。
據老詹講，佢當面問CY點解考慮2012年出選，對方話因為一對仔女去咗外國留學，太太好多時間離港陪伴仔女，佢獨守山頂大屋唔使陪家人，因此可以花多啲時間出嚟應酬，服務社會。家人去咗外地，CY一個人留港建港，聽落甚有當年民建聯「太空成」壯烈情懷。
執形象洗刷奸人氣息
CY唔使陪細路，決定踏出一步參選，八方唔知道有幾多香港人打算搵定後路，老詹則坦言CY咁講法好礙耳，「我同佢講，唔係香港需要你服務，你應該好似乞兒咁，向選委求票。」老詹又同八方講，既然CY上門求教，佢亦言無不盡，醒三招過佢。
第一係搵個顧問大執形象，洗刷奸人氣息；第二係拉攏民建聯、鄉議局同各大商會，因為佢哋喺選委會有幾百票；最後就係組閣班底要打得，屬意嘅司局長人選要在立法會有票支持，否則冇票在手，得個樣係冇用嘅。
聽完老詹意見，CY有乜想法不得而知，老詹則話暫時仍然睇好唐英年，因為佢血統優良，往績有紋有路，目前估計有六、七成機會接莊，老詹指若非老董中途落馬，上海幫失勢，唐公子surewin㖭，不過家陣都快放領先，輸蝕在唔夠強勢啫。
至於鬍鬚曾，老詹認為能力平平，不入流；泛民方面，公民黨梁家傑應該會再去馬，但純屬搞局，可以不理。老詹估計，未來一年半載係關鍵時刻，明年底特首跑馬仔遊戲應該逐漸明朗化。呢次詹梁會據講最初由飛哥穿針引線，老詹與CY曾在臨立會共事，總算相識一場，搵中間人咁見外，老詹怕有人嫌佢係釋囚而婉拒，後來CY親自約見才成事，多年來吊高嚟賣嘅CY，初次玩選舉遊戲，相信要從頭學起。
mailto:[email protected]