香港有個業主會，個網站周不時會登一啲欠租，甚至搞破壞嘅租霸名單，入面嘅控訴有血有淚，好警世。我唔知英國有冇類似組織，如果有，泰維斯肯定喺租霸榜榜上有名，因為佢離開曼聯時，搞到球會租畀佢嘅大宅屋唔似屋，唔講仲以為俾人爆格過㖭。
泰維斯效力曼聯期間，會方租咗間位於柴郡，價值150萬鎊（約1,900萬港元）嘅大宅（圖）畀佢住，到底係泰維斯同外形一樣咁不拘小節，唔識錫住間屋，抑或離隊前同會方鬧得不快，搵間屋發洩，看官自己判斷，總之曼聯早排搵人收屋嘅時候，驚見屋入面嘅意大利名牌傢私受到嚴重破壞，好多都花晒；泰維斯隻愛犬亦老實不客氣，抓爛或者咬爛屋內物件、設備不計其數。
曼聯花30,000鎊維修費
聽曼聯球會消息人士講，雖然泰維斯已經走佬，但球會始終要為佢再出多一次糧——維修費，盛惠30,000鎊：「搞成咁，真係唔知邊個人要負責，總之事情總算告一段落。」
邊個需要負責？唔使問阿貴都知，理得你同球會係咪鬧翻，理得你有心或冇意，做得租客而冇好好保養間屋，點講都唔啱，搞到間屋咁衰，留低一堆「蘇州屎」，呢種行為同啲劣品中學生去離島租完度假屋，搞到亂晒坑有何分別？
講到尾，我就信呢單嘢係泰維斯乘機發洩，鬼咩，人都走咗，仲咬住費格遜唔放，前日一方面多謝曼聯隊友，但同時又再次炮轟費Sir冷落佢，話日後見面都唔知同唔同對方握手喎，所謂今日留一線，他朝好相見，話晒大家身處曼市，碰頭機會唔少，好心咪咁小器啦。