新加坡之行太開心，講極唔完。自己揸開的士，就梗係對當地同行嘅情況特別留意。好多人都知，喺當地「打的」，「一般」情形下計落都係幾十蚊港紙。咩叫一般情形下？即係無任何附加費，除出入有電子道路收費嘅地區、特別繁忙區、黃金時段、午夜時段、公眾假期、往返機場……等等多不勝數外，連當地人都話記唔晒。每項附加費都可重叠，舉個例：公眾假期晚上7點由機場踩入烏節路，再途經收費路段，呵呵，咁就襟計囉，齋睇錶可能只係十零蚊坡紙，不過埋單分分鐘要Double。乘客同司機都好煩啦！香港雖然都有短加長減，但就簡單好多。不過講到尾，我都係羨慕新加坡嘅行家，因為就我所見，基本上喺烏節路等旺區，搭的士人龍從來唔會斷，肯花錢都要慢慢排隊。唉，香港就只有的士拉龍等客，果真同人唔同命。（大話星遊之三）
文：黃師傅