南華今季連番重金收購港隊球員，又以過百萬年薪搵高質外援，成隊港版皇馬咁款；上季再交白卷嘅傑志，今季搵咗西甲班霸巴塞隆拿青訓總監甘巴奧執教，仲喺巴塞所在處加泰隆尼亞地區搵咗5件未夠30歲西班牙兵加盟，包括上3季喺西丙共入咗58球嘅禾志利，希望重振聲威。
甘巴奧噚日帶住由嚴選出嚟嘅「鬥牛勇士」，到港向總領隊伍健報到，而佢抵港後同我求大俠講，唔清楚南華今季盡收天下兵器，仲話要締聯賽全勝紀錄嘅新聞；甘巴奧個人今季對傑志好有期望，踢法上會好似皇馬死敵巴塞隆拿咁，強調進攻同娛樂性。相信佢帶嚟嘅西班牙兵，配合傑志現有人腳，可以組成一支有實力挑戰各項錦標嘅球隊。
球迷想睇呢套港版皇馬對巴塞唔使好耐，下個月中兩隊就會喺港職聯籌款表演賽碰頭，到時大家可以落足眼力睇。