建制派議員上星期在中環上海總會擺「鴻門宴」，自己友聚會，冇泛民份，正常，連曾主席都冇叫，古怪，八方探聽得知，呢餐飯果然有啲嘢。
據講當晚酒過三巡，部份新丁議員就發炮，指新一屆立法會成為社民連三子舞台，次次開會都係佢哋表演，其他議員連配角都不如，講起社民連，建制派敵愾同仇。現場消息稱，呢個原來只係前奏，大家講多幾句，終於有人炮打曾主席，指如果強勢主持會議，社民連如何得逞出位？飯局結果成為明批社民連，暗鬥曾主席大會。民建聯始料不及也。
有份食飯嘅老詹話唔記得詳情，只知道開咗10支酒，邊個埋單冇乜印象，不過佢又記得建制派同意日後每月搞一次類似飯局，形同泛民飯盒會，交流大家關注事務。飯局另有花邊，據稱有人認為大人食政治飯，葉劉不宜帶埋個女參加，但葉劉堅持，否則唔到，卒之加多雙筷了事。