今日一次過推介3隻較冷門的概念股，分別係滙源果汁（1886）、華潤燃氣（1193）同遠東控股（036），可小注入市，博升幾成或一倍，若揸長線，更可能會有意想不到收穫。
滙源嘅概念係會被收購，蒙牛乳業（2319）已被「嗒咗」，下一隻應會輪到滙源。中方消息指「買家陣營」已組成，可口可樂之前提出收購滙源的現金價係12.20元，新買家出價相信不會相差太差，而今次有上層祝福，禁購事件唔會重演，天價收購亦會水到渠成。
華燃有母公司扶持
滙源近日股價起動，交投亦略為轉活，近日高價6元有阻力，一破位而上，短線上升目標係250日線的7.40元水平。收購若落實，股價可見雙位數。
華潤燃氣有母公司扶持、注資同壯大概念。最近以組成合資公司收購鄭州燃氣（3928）的華潤集團，就係華燃的大股東，持有74.94%權益，華燃現時已打造成華潤系燃氣業務的旗艦，母公司日後將鄭燃注入，好合理。
華燃去年8月以38億元向母公司收購7個城市燃氣業務，今年又再收購多9個，現時母公司尚有15個燃氣項目，預計今年內可全部注入，屆時華燃經營項目便逾30個，2010年盈利可大幅上升。
華燃股價在5至6元間已橫行兩個月，近日升破6元的徘徊區上阻力，MACD亦出現「雙牛」入貨訊號，後市看好。過去一年，華燃走勢形成大圓底，右柄亦造成，確認中期上升大浪展開，目標指向10元水平。華燃係增長股，有母公司支持壯大，長線可繼續看好，在現水平倍升的可能性不容抹煞。
遠東控股係大冷門股，但近兩日突然有異動，股價同成交都大幅飆升，此類大冷門落後股一旦發力，升勢可以好誇張，短炒可以留意。
一直以來，遠控成交好少，每日只三四十萬股，但最近兩日，成交突然大增，上周四有441萬股，上周五350多萬股，而兩日股價亦大升，由0.50元搶上0.84元收市，大升68%，圖表訊號全面向好，短線有機會再爆升。
遠控有「細細粒」概念，市值僅2.5億元，可塑性甚高，一有大動作，股價可以翻幾番。
郭兆誠