颱風莫拉菲做咗快閃黨，噚日凌晨逼近搗亂香港之後即撇。住喺大埔嘅公民黨湯大狀都見證到莫拉菲嘅厲害，因為佢噚日朝一起身，就發現屋企後花園簡直變到災難片現場咁凌亂，幾棵生得好哋哋嘅樹吹斷晒，手臂咁粗嘅樹幹同樹枝跌到一地都係，最嚴重係有啲仲飛咗去隔籬屋個花園，真係唔好意思。
湯大狀做咗大埔居民20幾年，佢話今次颱風好明顯係歷來破壞力最強嘅一次。雖然災後花園滿目瘡痍，但湯大狀都總算還得神落，因為屋企人同兩隻狗仔Marty同Prince都平平安安冇穿冇爛。Marty同Prince仲好似發現新大陸咁，喺災後花園四處巡查，似足搜索犬。