舊時齋賣羽絨服嘅波司登（3998），最近收購咗男裝業務，開多一瓣搵真銀，而公司為咗幫「波司登男裝」呢個牌子打響名堂，使咗八位數字重金禮聘台灣歌手王力宏（Leehom）擔任代言人三年，仲喺上個禮拜揼本幾百萬人仔，租用京城鳥巢外面嘅運動場舉行簽約儀式，認真大陣仗。
貪佢兩岸三地知名度高
有「波司人」話，內部本身諗咗幾位帥哥，可以肩負代言人使命，之但係，Leehom非但形象健康兼有才華，更重要係佢至今仍然保持男裝代言嘅處子之身，以昂藏六呎、兩岸三地都具知名度嘅男歌星嚟計，果真買少見少，加上主席高德康同埋Leehom咁啱都係屬龍，配埋鳥巢做背景，難怪老闆都好滿意。
帥哥自然以女粉絲居多，男人未必受落喎？「波司人」講笑咁話，女性好多時主宰另一半嘅衣着品味，即係話，佢要你着乜就着乜，收到未？