藝人靠個樣搵食，佢哋嘅肖像肯定好值錢啦，馮仁昭近日就喺網上發現咗鍾欣桐（阿嬌）、容祖兒（Joey）、林志玲、韓星Rain同奧運金牌好手林丹嘅肖像，竟然被盜用做醫院代言人。嗰批宣傳相中，林志玲代言婦科，阿嬌代言口腔科，林丹同Rain就被男士治療中心盜用肖像。
「同律師商量」
阿嬌同Joey嘅經理人霍汶希（Mani）強調佢哋冇幫內地醫院做過代言人，Mani噚日喺電話訪問度話：「佢哋盜用咗阿嬌同Joey嘅肖像權，我會同律師商量，向有關方面採取法律行動，以保障藝人嘅利益。」Mani又表示英皇近日正代蔡卓妍（阿Sa）出頭，向內地追討一宗侵犯版權官司。
可要求賠償
就侵權事件，香港律師黃國桐噚日表示本地法律係冇肖像權，但內地法律就有，佢話：「藝人若發現佢哋嘅肖像喺內地俾人非法利用，佢哋可以透過律師去追究，並向有關方面要求賠償。」
林志玲無端端成為東莞一間醫院婦科嘅生招牌，佢噚日透過助手Gaby回應：「所有藝人會遇到這種事，要看找不找到對方，這邊那麼大，我們會好好處理，一定會作出法律行動。」Gaby話林志玲冇因為呢件事而心煩。
