勁靚的必殺，再逼真的動作，試問今時今日有邊隻電視遊戲唔係咁？玩得多都悶。其實遊戲好玩與否，重點唔係只識抄下去；就好似PSN將推出的《胖公主》，一個看似普通的搶和救公主形式，卻加上谷肥對家公主，導致超重運唔走的賤招，淨係聽條賤橋，已經抵讚！
記者︰陸俊雄
集體餵食
好變態，感覺就好似專登整肥你位愛人，等佢一直留在你身邊走唔到一樣。PS3將推出的網上下載遊戲《胖公主》，就係賤成咁。佢仲衰到叫你可以約埋班豬朋狗友，各自設定好自己身份，最多32人同時上網進行養豬行動。其實個遊戲主要分紅藍兩邊勢力，在完全對稱的地圖上，各據左右一方，最多16個打16個，監禁住對家公主的同時，又要想辦法在敵方手上救回自己公主。你唔想對家咁易救得走人，唯一方法就是不斷逼公主食Cake，越食越巨型，重到要用好多工人先搬得起。就係咁簡單的賤招，令一條老舊救人遊戲，當堂唔同晒。
戴帽分工
餵食搞笑，不過佢只佔《胖公主》其中一個部份，當中仲加入好似《AgeofEmpires》的元素，在佔據地中，會有專做生產的建築物；有些會彈帽出來，試過戴了工人帽後，崗位就係去鋤石仔斬樹搬運等，要將物資帶回指定建築物，來提升戰鬥力，連加快蛋糕的生產速度都有。唔做工人，你可以係戰士，又可以係弓箭手，再大範圍攻擊係魔法師，也可以係祭司，專幫人續命。所以崗位數量分配，都幾講策略。
血濺戰場
睇《胖公主》堆3DCute版公仔，好似一個發生在中世紀的時代背景，有森林、有石林，水仲會潮漲潮退，有10種不同地圖版面選擇，幾有童話世界Feel。點知你又係估佢唔到，人仔打起上來唔係人咁品，係會殺到一地血，好似一堆果醬咁；真係死於亂戰下，俾雷劈，被門壓死，乜都有。不過你唔想破壞Cute版氣氛，係可以開啟止血Setting，當堂殺人不見血了。
Profile
遊戲：胖公主
平台︰PSN
類型︰戰略
語言︰中/英/韓
人數︰1人/32人連線
開發商︰SECA
售賣平台︰PlayStationStore
推出日期︰待定
