恨踢南非世界盃嘅碧咸（右）本身已經唔想留喺美國，加上前排同當路雲為首嘅銀河隊友罵戰，踢得唔多開心嘅佢似乎想走人。不過，碧咸又唔使愁喎，事關熱刺同車仔兩支倫敦英超球會，最近就開到聲話歡迎呢位「萬人迷」加盟，真係「皇帝女唔憂嫁」。我求大俠仲收到風，話「碧咸嫂」維多莉亞最近周圍撲，同3個囝囝喺倫敦搵學校，似乎碧咸返英超嘅日子真係不遠矣喇。人哋既然咁賞識佢，碧咸都好識做，禮尚往來話車仔今季會壓倒曼聯奪英超，仲使問點解？因為領隊安察洛堤勁囉，安察洛堤對鞋真係俾碧咸擦到靚晒。曼聯迷話佢反骨？我求大俠話佢識撈啫。