過去一個多月，我幾乎晚晚無覺好瞓，都是因為你這個葉一南。你好揀唔揀，做咩揀中內子做你本新書的編輯？內子做事素來都是「人出豉油佢出清遠走地雞」；未開工，我已知她這份兼職工，注定蝕本收場。
為了做好這本書，我幾乎晚晚無住家飯食，還要長期忍受床頭燈的光害。為了捍衞《要省，不如不吃》這書名，她幾乎與出版社鬧翻。「不過是一本講飲講食的書，何必咁認真？」我好言相勸，她充耳不聞。在萬分困惑之下，忍不住偷偷拿起稿子來看。一看，看上了癮。整整一個月的時間，就這樣平白地「浪費」掉了。
要求嚴謹寸步不讓
閱讀這本書的後遺症，正逐步浮現。這晚，我們正為晚飯煩惱。孩子年紀尚小不知搵食艱難，隨便揀了一家一碟炒飯未計加一茶錢盛惠270元的飯店。「Daddy，呢碟飯睇嚟好好味。」「乖仔，單睇相，只睇到價錢及賣相，是睇唔出碟飯好唔好味的。」「食吓咪知囉。」「阿仔，電話幾號？」
睇開你在《飲食男女》的專欄，知你是一位性情中人。言文外表看似隨便不羈，講到大是大非的飲食及家國大事等問題（你沒看錯，飲食等同家國大事），卻變了另一個人，要求嚴謹寸步不讓。對飲食不講究的人，會認為「為兩餐啫，使乜咁認真？」你卻認為，煮得不好，是對食物的大不敬，為免打入十八層地獄，做乞兒也不該開餐館做廚師。你說我的兒子有潛質做你徒弟，還是等我事業打好基礎後再算。
睇完這本書，讀者很難會不嚮往一南式的生活。收入不足投資失利，怎可能過葉一南式生活？將一南式的生活態度應用於投資及事業上，想必也有意想不到的功效。
林少陽
以立投資管理投資總監