我求大俠一支公好鍾意行街，成日見到啲電訊公司喺街擺檔，sell咩100M極速寬頻上網，sales為客日曬雨淋，睇見都慘。早兩日我無聊飛咗去馬德里一轉，咁啱俾我喺街撞到皇馬會長佩雷斯又喺度擺檔，但佢sell嘅係球員，仲有個叫「皇馬100M賣人套餐」㖭！啊，原來皇馬要賣球員，籌旗1億歐元填氹！
今夏轉會市場皇馬做咗大主角，羅致卡卡、基斯坦奴朗拿度（C朗）、賓施馬同艾比奧爾嘅轉會費，就至少使咗2億歐元（約21.8億港元）。講真，皇馬何來咁有錢吖？咪又係同銀行借吓賒吓！
嗰日佩雷斯同我求大俠介紹呢個「皇馬100M賣人套餐」，就話好多球員佢哋都用唔着，希望藉住賣走洛賓（2,500萬歐元）、亨特拉爾（2,000萬歐元）、迪亞拉（2,000萬歐元）、尼格度（1,700萬歐元）、雲達華治（1,500萬歐元）同軒斯（1,000萬歐元）6位球星，可以籌得1億歐元（100M）嘅收入。
過氣球星唔值錢
我求大俠唔係想潑佩雷斯冷水，我見到佢呢個定得咁高價錢嘅賣人套餐，都忍唔住同佢拗頸兩句。講真吖，家陣迪亞拉同亨特拉爾仲邊度值2,000萬歐元？更加冇球會肯用2,500萬歐元斟洛賓啦！驚佢set到個價咁高，到時有價冇市咋。老老實實，皇馬喺呢6位球星身上，執番60、70M已經算好好彩。100M？你估真係搞寬頻上網咩！
聽講家真係冇乜動靜，最有機會甩手嘅都係亨特拉爾，但史特加嗰邊只願意出價1,800萬歐元，同皇馬開嘅都爭「兩球」喎，仲要亨仔唔係好想去。尼格度話晒係西甲人氣射手，而西維爾同維拉利爾都爭住要，但佢哋講到明唔會出咁貴價，睇嚟呢個「皇馬100M賣人套餐」要修改條款先吸引到人喎！