董事長S請吃午飯，地點自然係陸羽啦，無理由唔幫襯自己嘅茶室嘅啫，董事長S喜歡定期與文化界人士交往，此日在座者就有博士L、教授L、總編M，左丁山敬陪末席，總編Y不知是否因為書展臨近，要務纏身，臨時冇出現，可惜也。
董事長S係商場掌故活字典，舊事無所不識，佢講起中環電話公司，我哋摸不着頭腦，中環邊度有間電話公司呀？董事長S話幾十年前電話公司在電車路雪廠街交界，聽落就係現在中國建設銀行中環分行或Hermes店所在地，我哋聽得津津有味。教授L帶來兩本書相贈，其一名《吞聲忍語──日治時期香港人的集體回憶》，由中華書局出版，係一本口述歷史之紀錄，有十六位先生女士細說日治時期生活情況。我哋一群戰後出生嘅，當然知道甚少，聽父母之言，只係零碎回憶，有咗呢本書，香港戰後出生一代可以知道日治時期歷史多一點。其二名《侯寶璋家族史》，和平圖書出版，左丁山不知侯寶璋是何人，教授L話侯寶璋（1893-1967）係病理學家，安徽人，出身中醫之家，齊魯大學醫科畢業，曾擔任香港大學醫學院病理系主任（1948-1960），中國醫科大學（今協和醫科大學）副校長，係中國近代病理學先驅，港大醫學院校友會會長李健鴻教授、梁智鴻醫生、楊紫芝教授、達安輝教授等名人都係侯教授嘅學生。如此顯赫人物，香港大概唔係好多人識得，若非教授L贈書，左丁山點會知道吖，董事長S就識得侯教授一位兒子侯勵存，即係現時嘅養和醫院組織病理暨細胞學主任，今年七十七歲咯。
若無史書，前人成就、知識無以傳承，可惜今時今日，願意修讀歷史嘅學生漸少，香港大學歷史系恐怕會在幾年後成為歷史。博士L就係歷史科博士，現主持出版機構，對此現象感到好無奈。奇怪嘅係，中年人對歷史就好有興趣，名嘴N啱啱修畢中大比較歷史碩士課程，開心得很，佢話同學甚多，平均年齡三十幾歲，人人公餘上學，唔知讀得幾高興。新科碩士N話報讀人數更多，近三百人，真係冇人估得到！