香港尺金寸土，部份店舖貨架隱藏傷人陷阱！有讀者在玩具反斗城被架上跌下貨物砸致骨裂，擬追討醫藥費，店方竟建議賠償贈券；有律師批評賠贈券做法不當。
李小姐上月與內地來港旅行的弟婦逛銅鑼灣玩具反斗城，有職員在滑板貨架旁向另一客人介紹，當拿起其中一個滑板時另一滑板跌下正中弟婦左腳拇趾。「當時佢痛到行唔到，休息半個鐘後仲好痛，即時叫救護車。」
其弟婦隨即被送律敦治醫院急症室，照X光證實骨裂。
「佢哋態度勁差」
當日稍後李小姐持醫生證明向反斗城追討：「職員話公司一定會負責，問我肯唔肯收COUPON（贈券）了事，如果唔肯就要交驗傷證明由保險公司處理，普通醫生紙都唔得！咁索取X光片嘅錢係咪佢哋畀埋先？我哋唔係追討額外賠償，只想醫藥費實報實銷，但佢哋態度勁差，仲問我途中係咪有個小朋友踩到佢隻腳，就算踩到會唔會骨裂咁嚴重？佢哋根本就想推卸責任！」由於弟婦持雙程證來港，需付政府正價診金570元，三次合共1,710元，事隔一個月現已漸癒回鄉，要特地來港索取醫療報告。
玩具反斗城否認建議賠贈券：「我哋冇講過只賠現金券，事實上申請索償要交齊所有資料，我哋等緊客人提供書面索償要求，我哋只係中間人角色，負責轉交文件由保險公司處理。」
入稟控店方疏忽
李小姐說：「事發時貨架滑板全部打直放，佢哋喺警察嚟之前全部執過晒打橫放，當時無影相都知蝕咗，佢哋家一定唔會認。」李小姐指已諮詢律師意見，預備入稟小額錢債控店方疏忽。
檔案編號：0623067
法律意見：有權追討「傷痛賠償」
梁永鏗律師表示傷者絕對有權要求對方賠償醫藥費以外的費用：「假如佢哋真係講過只賠現金券唔賠錢，咁就極之唔恰當，因為傷者要求賠償醫藥費外，仲可以追討傷痛賠償。」
梁續稱傷痛賠償金額視嚴重性而定：「如一個足球員被弄斷腳，據案例，有機會獲50萬傷痛賠償。今次個案未知傷者涉及嘅影響有幾大，可能只賠幾千蚊。」如接受贈券賠償，只要列明賠償協議，日後仍有追討機會。「傷者最好白紙黑字清楚列明賠償協議，以保障自己，例如『日後有任何後遺症被證實與今次事件有關可另作賠償』。」
傷痛賠償包括：因為痛楚太強不能忍受、心情影響變得不快樂、生活改變造成不方便、入息損失及物質損失等。
社會服務
報料熱線：29290000
社會服務熱線：29908288
蘋果日報慈善基金：29908688
傳真：37112468
網上捐款： http://charity.appledaily.com.hk/donate
各類表格： http://charity.appledaily.com.hk/forms
電郵：mailto:[email protected]
匿名投訴恕不處理。一經投訴，本報保留刊登權利。