早幾日瞓緊晏覺突然電話響，原來細姪女打來求救，咩事呀？「我油燈着咗，點算呀？」點算？去油站入油囉！細姪女都未聽我講完，又一輪嘴，「會唔會死火呀？我唔夠力推車……」即時唔畀佢再講，揸車時無論發生咩事，最緊要鎮定！
部車無油就實會死火啦，當部車行行吓，儀錶板上嘅燃油警示燈（即油燈）着咗嘅話，千祈咪騰雞，一般車都可以行多20至30公里，香港地有幾大呀，實搵到油站入油啦！若然真係當黑，無油到死火又可以點呢？教駕駛嘅朋友話，引擎死火會連帶車身制動輔助系統都失去動力，呢個時候個軚會好重、Brake好硬，只要出力啲都仲可以Control到部車，最重要係留意位置，記得要亮死火燈提醒後面汽車，利用餘力駛埋一邊又或者安全地方至停低再Call拖車。如果真係停咗喺危險地方，就可以試吓推回P波再撻車，油泵有機會將油缸內僅餘汽油送到引擎，最多可以走多十零米，但副偈都幾傷㗎！
文：大姨媽