踏入中年嘅男人除咗容易發福之外，仲會改變口味，開始愛古董。修讀美術嘅連凱（Andrew）就視古董車為藝術品，不過就幸好未發福。悉心為珍藏加加減減，仲會慢慢洗刷最愛嘅電鍍配件，面對即將去北京發展嘅日子，呢部唯一鮮橙色愛車都唔捨得帶去「俾人寫字」。
記者：許維雅
攝影：伍慶泉
ClassicMini一向多Fans，但要搵到一架停產已久嘅心水車仔作珍藏，有時實在可遇不可求，所以連凱都大嘆買車好多時都要講緣份，「因為有時你專登去搵都搵唔到，呢架車係我5年前去九龍灣車場時遇到，一睇見就好鍾意，即刻買咗，大概十萬蚊左右。」估唔到牛高馬大嘅連凱唯一嘅車就係古董Mini，「我唔鍾意揸快車，我偏好睇外形，所以特別鍾情古董車，其實MG、Jaguar同Mini都鍾意，但頭兩者喺香港較難搵。呢架98年生產嘅MiniMkIV好難得仲保持到七十年代嘅懷舊外形，但就用咗當時最新嘅引擎，所以性能各方面都仲好好。尤其入彎，呢啲舊車唔係風油軚，轉少少已經Feel到，敏感度好高，加上重心低，試過喺金鐘紅棉道轉大彎都好穩，連波子都追唔到。」
改裝逐格睇
畀心機呵護
連凱16歲已經喺美國開始揸車，「以往讀書時期都係揸日本車居多，鍾意日本車點粗揸都好穩陣，唔似美國車有好多細零件易壞嘅問題。」對車絕對唔算沉迷嘅佢，改車都係偏愛揀一啲點綴式嘅配件，尤其係電鍍物料嘅懷舊配飾，因為佢當車係藝術品。「家我會當車係一件藝術品，得閒時就慢慢欣賞吓佢，幫佢加啲配件粉飾一下，所以都好畀心機保養佢。尤其係我架ClassicMini多電鍍配件，香港天氣又潮濕，要花多好多時間保養。古董Mini有好多嘢要注意，好似洗完車要抹得夠乾，唔係啲電鍍配件好易生銹，有時唔喺香港一個月返嚟，就要慢慢用去銹膏擦。Mini車頭細，引擎同水箱太近，好易水滾，要多啲睇住水箱夠唔夠水。最後就係比較易燒Fuse，撻唔着架車。」
愛佢才分手
不過對自己部珍藏細心呵護嘅連凱嚟緊都要逼於無奈同愛車分離，因為佢會去北京發展，做特技化妝，忍痛唔畀珍藏伴隨嘅原因竟然係「怕咗北京人愛寫字」。「一來要改左軚同埋手續麻煩，二來上到北京就唔會揸咁靚嘅車，珍藏唔使兩個月一定花晒。我有朋友有架好靚嘅四人車，型號好似係有個四字，點知俾人刮花，寫住『4×4=16』。又有另一個朋友架靚車嘅車頂俾人刮花，寫咗好大隻『好車』兩個字。我可能買架平車或者Jeep喺北京代步，總之就係點花點污糟都唔怕嗰啲。」原來同珍藏分開都係因為太愛佢。
佢有靈性㗎！
我覺得你越急佢就越易壞。我試過下午四點鐘喺紅隧入口死火，尷尬到暈，搞到要拖車，但之後竟然又乜事都冇，我覺得佢成日整蠱我囉。
98MiniMkIV規格
引擎：1,271cc水冷直四
馬力：53ps/5,700rpm
扭力：9.3kgm/2,600rpm
傳動：四前速自動波、前驅
改裝查詢：MiniPit（23641666）