二次大戰時期的時代背景，一個有俠盜的世界，這個日本奇俠更會中國國技—變臉，幾種元素加起來相當古怪。加上是金城武搭松隆子，買碟一刻明知可能中伏，都要把心一橫一試。誰不知，動作多多兼夾奇幻有趣，金城武真識揀片拍。
記者︰陸俊雄
金城武做替死鬼
唔好諗住金城武一開波就做大俠，其實佢只係個窮鬼魔術師。因為佢係馬戲班台柱，身手幾好，點知就被K-20，即「怪俠二十面」睇中，呃佢去做狗仔隊偷拍一位男爵的婚禮，結果被人當成K-20兼打餐飽。講到打，套戲啲出拳揮棍揮袖聲都做得幾誇張，見帥哥被人打到眼都腫埋，真係心痛死。
步入K-20之路
無端端屈個好人做替死鬼，真正的K-20俠盜好極都有限；金城武為了捉到呢個衰人，開始練功，要訓練自己成為一個賊。呢部份男生會覺得好睇，因為唔少日本片，特別係運動勵志片，總有練功「升呢」環節。例如直線逃生法，學蝙蝠俠出掛鈎飛來飛去，仲有好精采的變臉等，明知CG但出招接駁好順暢，有意外驚喜。
最後金城武憑天份加勤力，終於有力對付K-20，全戲的後半部仲會越來越多奇幻特技出現，但最後係點？K-20為乜要害金城武，要留番你去買碟睇。只可以告訴你會有一個真正的俠盜誕生，而且不似家陣啲電影，無端端搵個人出來解畫話自己係兇手，愚弄觀眾，奇情得來係要有鋪排，話晒都係改編自著名的日本劇作家北村想的作品。
竟然無Makingof
幾欣賞戲中的環境，一個虛構出來的舞台，時間約在昭和二十年代，有錢人的家似舊上海，窮人住的是殘破木屋小村落。原本好想睇佢點樣造景，或是解構變臉過程，點知隻碟好衰咁沒有Makingof，只有幾張劇照給你睇。想點呀，話晒隻DVD都接近成嚿水，我好耐無睇過無Bonus的影碟了。
