有靚仔導演之稱嘅「馮仁追」，一向為人市儈，有利用價值就乜都得，呢期佢自動蒲頭，仲猛烈追求性感女星「厚唇」，大搞緋聞。其實俾佢追親嘅女仔都唔知俾佢利用緊，佢嘅前女友「冇所謂」同佢拍拖嗰時，佢成日搵女友出嚟合作拍戲，咁先有迴響，佢哋甩咗拖之後，馮仁追就開始發霉，成大半年冇工開，係咁齋坐落去好唔掂，於是佢呢期專攻厚唇芳心，又靜雞雞放料畀人博見報。
劇本冇人吼
二五仔話因為厚唇嘅老闆「肥爺」好錫佢，於是馮仁追想埋堆，睇吓撈到乜嘢油水，事關佢嘅心血劇本一直冇人問津，搞到佢搵唔到老襯開戲，而一向愛情至上嘅厚唇家陣芳心寂寞，如果佢成功冧掂伊人，肥爺分分鐘肯揼本拍戲，咁大條水喉射住，梗係制得過。
Textby關仁
