校啱時間，鬼祟公佈特首辦主任陳德霖接掌金管局後，特首煲呔終於可以鬆一鬆。前日下晝搞完新人事任命大龍鳳後，夜晚黑煲呔同埋太太去到紅館睇演唱會，捧黎天王「DreamWeddingLeonLive09」場。黎天王個唱首場傳出詐彈驚魂，前晚特首駕到，相信保安工夫做到加零一，clear晒先敢開騷。
煲呔安心睇騷
安插心腹入金管局、特首辦妥妥當當，煲呔放下一樁心事，前晚表現輕鬆笑口噬噬，暫棄煲呔look，着住件白色恤衫睇騷，曾太則着紅色花花外套，挽黑色手袋，兩公婆打扮明顯冇襯過就出門口。特首畀面，演唱會主人家東亞娛樂老闆岳少親自到紅館門外迎接，握晒手做知客帶領煲呔入場。有記者問煲呔：「你係咪Leon嘅fans？」佢笑笑口冇答。
岳少陪煲呔夫婦坐前排，旁邊係恒生副董事長兼行政總裁梁高美懿。開騷後黎明唱幾首快歌搞㷫個場，之後就發揮講金句本色，「我覺得一個人只要心地好，盡可能做每一件事，呢一個人就係好人。」雖然唔知佢想講乜，不過冇所謂，都大把人鼓掌；掌聲未停，黎生繼續講嘢，「好多謝曾特首做完工作，變番一個平凡人，攞兩個鐘時間嚟睇演唱會。」
觀眾聽話挺曾
哦！原來係讚煲呔，咁天王究竟想話煲呔係好人定平凡人呢？八方尚要花啲時間參透，不過現場好多人即時應黎明要求大拍手掌，仲有人大叫：「曾特首支持你。」喺演唱會竟然聽到挺曾說話，煲呔龍顏大悅。黎明讚特首係應該嘅，事關佢剛獲頒發銅紫荊星章，呢啲極盡視聽之娛嘅騷，第日真係要多多捧場。
mailto:[email protected]