○九年書展即將開始，七月二十二至二十八日，會展又試會逼爆，大家趁墟去睇新書，聽講座。左丁山對所謂o靚模，知得甚少，但見到有人聯署反對o靚模參加書展，覺得不必吖，o靚模與著書、讀書是否扯得上關係，不必深究，反正係宣傳噱頭而已。冇o靚模「入侵」，過往都有明星歌星出書，在書展內搞簽名會咁啦，唔通要主辦當局明文禁止？難道書展一定要搵與季羨林、任繼愈同類嘅國寶、余秋雨呢類大「知識分子」到場演講先至真係弘揚書展？香港人有冇咁清高呀？展覽者，大騷也，熱鬧啲無傷大雅，唔使咁緊張。
臨近書展，新版書特多，讀者Ｍ來電郵問紫微Ｙ的新書《推斷法》會否在書展出現，左丁山唔知道，無以作答。劉天賜就通知有三本新作《基督解密》，《不動腦年代》上下兩冊及《提防考起》出版。賜官並會駐場簽名，賜官現在白頭白鬚，成個峨眉山道士下山模樣，睇個樣可以頂死o靚模。另外中大讀書會又在書展期間推出「金庸小說版本展」（七月二十五日至二十六日山東街90A號），展品包括六十年代連載金庸小說嘅《明報》、《武俠與歷史》、《東南亞周刊》之各種不同版本嘅金庸舊版小說，凡四十餘種，並且有埋五十年來六十幾種金庸小說漫畫，今已稀有罕見，甚有價值。可惜並冇提及《香港商報》，左丁山記得《碧血劍》係在《商報》連載嘅，當時《明報》仲未面世。
展覽場所原來係中文大學專業進修學院旺角教學中心，從旺角地鐵站出口E2走上地面，可以搵到，七月二十四日下午六時仲搵埋古天農（中英劇團）、梁國城（舞蹈團）及漫畫家邱福龍一齊討論「武俠小說多媒體再生」，幾有趣味噃。可惜到時左丁山可能去咗旅行啫。
一位讀者Philip回應上星期本欄〈去邊度旅行〉，建議左丁山去吉隆坡，租車揸去Lumut過海去PangkorIsland，好正喎。十幾年前，左丁山隔年就去馬來西亞，檳城、吉隆坡、馬六甲、沙巴、浮羅交怡、Pangkor去勻。最後一次係一九九四年到TiomanIsland，從新加坡坐小型飛機去，此島風光明媚，沙灘延綿，值得一遊，只不過左丁山在此游泳，突遇風雲變色，雷電交加，幾乎遇溺，自此唔敢再去馬來西亞享受陽光與海灘，但以事論事，Langkawi、Pangkor與Tioman都係值得愛好水上活動人士一遊嘅！