上周市況表面上峯迴路轉，但只要企後一步，不難想像好友已掌握大局，周一期指由開市17600水平反覆急跌，曾在兩分鐘內跌去400點，如果事前未有心理準備，肯定會被嚇個措手不及，還好大市挨近筆者首目標17000，士佳開始補回部份存貨，尤其部份個股已不理大市自行急升，顯示大戶早已急不及待買貨，筆者在17050-17200雖然未及補足貨，但於較高水平已差不多全線補回，亦在網上通知學員要增持港股至50-60%，轉眼期指由低位回升至近18900水平。
以注碼控制風險
當日大市恐慌下跌，入市買貨係反人性化操作，大部份投資者都係諗住「睇定啲」，到大市急劇反彈，投資者又嫌高，唔敢買，那就會在「等吓先」中度過牛市，就以兩隻個股威勝集團（3393）及比亞迪股份（1211）為例，筆者雖然早已持有，但其由低位狂升，士佳亦有被升勢嚇窒，升得多就怕會有調整，邊升邊套利，所持股量已經不多，為了彌補這種患得患失的心情，只有不斷換入其他估值較便宜的個股，保持一定注碼，當然，最好係一直持有強勢股，但卻唔係人人做得到，所以其中一個可行做法，係到了目標以後先平一半，其餘再機械式操作，以技術分析離市。
讀者可能話，這些強股買賣盤近日越來越疏落，會否增加買貨的危險性？買賣盤太疏似乎唔係理想，但首先要知為何出現此情況，以威勝為例，此股買賣本來甚活躍，不過一升再升之下，街貨已日漸減少，以至差價大增，這顯示貨源可能已盡入基金大戶等強者手裏。這種情況在以往牛市明星股上十分常見，例如港機工程（044）、東方海外（316）等，皆因太過渴市，街貨嚴重不足，不少投資者會唔捨得幾格差價，白白看着個股升完又升，但想深一層，其實此情況不見得係壞事，因為街貨不足，基金亦非常惜貨，令這類個股爆發力驚人，抗跌力亦特別強。
以上個股買唔買得過，筆者覺得股價早已反映基金大戶取向，惟人性不變，見個股急升始終會畏高，不妨以注碼控制風險，那就揸得心安理得，讀者日後亦可以吼一些不理大市，自行創出新高的個股，例如筆者愛股騰訊控股（700）及恒安國際（1044）等。當然，凡事看兩面，這些創新高的新貴可能亦會受批股傳聞影響，近日亦有些新能源股配售，但批完之後又係一條好漢，長線坐貨都唔擔心。
張士佳