事旦男在六四燭光集會開創舉牌上鏡潮流後，無綫新聞部真係好唔得閒，噚晚六點半新聞，記者彭國柱喺尖嘴碼頭做直播報道颱風消息，忽然有人在佢身後拉Banner，恐防事旦男又現身，攝影師第一時間將鏡頭舉高影天空閃避，點知鏡頭擺番正後，條Banner繼續嘗試入境，為免出事，惟有中斷直播。
風雨飄搖事旦男冇出動，博上鏡嘅係「尖碼之星」，佢哋特別整幅「反對遷拆尖沙嘴碼頭巴士總站」橫額，吼準打風TVB一定會去天星碼頭做直播，所以在場恭候。佢哋不滿TVB一直唔報道佢哋要求保留天星巴士總站消息，先出此計策，又指一旦巴士站消失變成商場，第日TVB都冇咗個可以做新聞嘅公共空間，為人為己，應該做吓嘢。