o靚模殺入書展，連退出公民黨嘅譚香文都出書，爆盡政圈見聞。佢噚日舉行新書發佈會，當然冇好似o靚模咁瞓身谷書，但都搵名師set行個頭先出場。
新書最有話題性係未出街，湯家驊就揚言要發律師信禁止佢亂爆大鑊，噚日八方唔見公民黨人影，捧場者多數係譚嘅街坊朋友，有幾個女士同譚香文好似樣，唔知仲以為佢哋係親戚。湯大狀咁大反應，譚香文稱只係有人小事化大，佢自己唔怕講事實，不過出版商唔想收律師信，就將被指會令個別人士「極度不安」嘅幾句句子打黑格。
其實所謂唔出得街內容，基本上好多人知，不過打格仔懶神秘，欲蓋彌彰反而惹人遐想，即係好似禁書咁，越禁就越好賣。o靚模搞簽名會冧電車男，譚香文話正考慮下星期去書展搞簽名會。