一直有投資報刊嘅賭王何鴻燊，最近涉足香港報業，《新報》社長胡雪麗前日向全體員工發出內部通告，宣佈賭王最近正式入股該報。據稱通告強調賭王入股《新報》純屬支持報社，賭王唔會過問任何編採運作事宜，《新報》編採獨立不變，一切如常。
通告冇透露賭王入股金額及所佔股權比例，暫未知呢次係以個人名義入股抑或上市公司投資。《新報》老闆係英皇楊受成，英皇系公司亦冇宣佈賭王成為報紙新股東消息。新報1959年由羅斌創辦，曾在美國及澳州開辦《新報》，《新報》在港上市幾年後，由姓郭台商買下，九十年代楊受成接手，近年創辦《新報今日澳門》每日在澳門免費派送。