航空Ｄ本係公司嘅公關總經理，即將調往澳洲雪梨，就任西南太平洋地區總經理之職，下個月就舉家遷往雪梨。於是公關大姐大約佢吃午飯，當是送行。航空Ｄ平時半日在東涌上班，半日在市區太古廣場嘅總部，於是大姐大就約在太古廣場一期之玻璃屋──Domani──吃意大利菜，大家方便。航空Ｄ話佢與同事平時下午五時後都會在Domani露天花園座位飲番杯做腦震盪，選呢間餐廳正合佢意。是日中午氣溫超過三十度，但仍然有十零人選擇在露天座位晉餐，唔通太陽傘下真係有咁好情調？
航空Ｄ嘅香港職位，據悉正在招聘高手接替，問航空Ｄ搵緊邊個公關同行，佢話唔講得要保密。佢唔講啫，左丁山就已經知道有獵頭族周圍搵人，左丁山有朋友收到獵頭族電話。咁啱有一間巨型地產公司又係搵緊公關部阿頭，又有搵過左丁山朋友去見工，唔係見大老闆噃，而係先見已退休兩三年嘅老臣子Ｍ姐，呢個世界有好多人退而不休，備受舊老闆重視重用，新一輩唔恨得咁多咯。
我哋點菜之際，見到巨型公用事業公司嘅公關阿頭Ｙ姐與成班同事行入嚟，打過招呼，Ｙ姐話公司就在附近，步行十分鐘落山可到Domani，好方便咁講。見到Ｙ姐，聯想起呢排「公關總經理」（正式啲可以叫做企業傳訊及公共事務總經理）渴市，唔知獵頭族有冇打電話畀Ｙ姐呢？佢本是英文傳媒記者出身，好彩及早轉行做公關，否則今日會遇上ChrisYeung同一命運，提早退休。
航空Ｄ話做公關三年，學到唔少嘢，對佢好有用，重返營業管理前線後，可以做得更好。左丁山就「警告」佢，去咗澳洲之後，佢嘅仔女入小學，學唔到中文，他日調回香港之時，兒女被逼繼續讀國際學校，因住養大後不識中文，英文好都冇用。航空Ｄ話：「多謝提醒，我十幾年前駐北京，好明白中文之重要性。我哋一家人在家裏講普通話嘅，我會好注意佢哋啲中文學習。」航空Ｄ與記者小Ｂ飲過幾次茶，對小Ｂ之聰明博學，留下深刻印象，只可惜小Ｂ在加拿大美國長大、讀書，英文雖然叻極，奈何唔識中文，有好工而唔做得，不無遺憾也。