我求大俠星期四下晝無端端收到喺老尖返工嘅老友電話：「喂，老求，我睇到奧尼爾真人呀，佢好大隻，又好nice！」我立即鬧老友吹水唔抹嘴，係唔係睇NBA睇到上腦，點知老友誓神劈願冇講大話；最後小弟上香港各大討論區，真係有網友將呢位巨無霸中鋒喺老尖shopping嘅相擺上網，原來我老友冇講大話。
shopping掃電器手袋
下季轉投騎士，同勒邦占士拍住上嘅奧尼爾，一身裝束真係唔似年薪2,100萬美元嘅超級巨星；衣着只係一件白色T恤；加上闊身牛仔褲，孭住個紅色背囊，心口掛住相機，同一般自由行真係冇分別。香港天時暑熱，奧尼爾當然都怕怕，好多時都留喺有冷氣嘅海港城呢個名店林立嘅商場入邊，喺名店買咗個大手袋，之後就到電器舖，試聽巨型耳筒，但結果就「搞搞震，冇幫襯」。
香港維港景色舉世知名，奧尼爾離開海港城，都喺五支旗杆同鐘樓附近，親自揸機拍低維港美景；而且奧尼爾之前都講過，對中國傳統有興趣，所以都有到附近嘅國貨公司，睇吓中國傳統工藝品。身高7呎1吋嘅奧尼爾「出巡」，當然吸引唔少球迷，難得佢全程冇黑面，仲同粉絲sayhi，但球迷想合照就俾身旁嘅保鑣勸阻嘞。
拜恩下周五嚟港「接力」
今次奧尼爾神秘抵港，相信係出席完體育用品贊助商喺中國搞完嘅宣傳，順道嚟香港購物；奧尼爾上周六（7月11日）到北京出席贊助商嘅記者會，周一就到鄭州少林寺同武僧切磋，最後一站嚟到四川，花樣多多嘅奧尼爾同大熊貓合照，最後更送出簽名籃球畀地震災區綿陽嘅同學仔㖭。
其實，香港出名係購物天堂，近期都有好多體育明星趁休季訪港，好似之前已有網民，趁快艇白朗戴維斯、湖人中鋒拜林嚟香港時，成功同佢哋合照。應屆NBA總決賽MVP拜恩，就喺下個禮拜五（7月24日）訪港。曾特首成日話振興經濟，計我求大俠認為，香港政府不如送機票送食宿，邀請呢啲體育巨星嚟香港，肯定對旅遊業有幫助啦！
