書展年年有話題，今年風雲人物鐵定是一群乳香四射（或乳臭未乾？）的o靚模，剝吓除吓，肢爪從C叠蔓延至A叠，一個國際都會的年度書展，開鑼前最受注目的居然是以平靚正的水着寫真，這城市到底叫開放還是墮落？今年，林一峰和吳日言，也趕在書展趁熱鬧，都一樣有拍外景，但比那群o靚模，穿多好多布，擺明不賣春光，只說風光。
記者：劉嘉蕙（林一峰）、吳允冲（吳日言）
每個選擇都有遺憾，每個遺憾都有轉機
唔帶結他去旅行
訪問前做功課，十篇訪問稿，九篇會出現以下意思相同的字句：「好羨慕林一峰成日去旅行，想去就去，隨心流浪。」
峰哥向後頓了頓身，不急不緩，交代7個字：「各有前因莫羨人。」
峰哥今年又出旅遊書了，第五本。
「今次不同，我想做的是旅遊文學，比較集中寫旅途上發生的事。」
心水清的你，或許記得他剛推出新碟，名字《思路MyLonelyPlanet》，所以旅遊書，是未有譜成旋律的心情札記貨頭貨尾？
峰哥稍為用力的澄清，「其實我係文字人嚟㗎！我童年夢想是做專欄作家，只是陰差陽錯做了音樂，我的歌最重要是歌詞，我的腦部運作，是先有概念，然後文字，最後才是音樂。」他旅途上的好朋友，是iPod、紙和筆，那些歐洲街頭結他賣唱場面，MV上才見。「我唔會帶支結他去旅行囉，咁重！」
臨記大廚
新書《遊子意外》記錄林一峰年半以來的足迹，從奧大利的初雪到澳洲魔鬼魚，與陌生人的接觸，才是旅途中最美好的部份。書中，讀者會看到「英國身蘇格蘭心」的老婆婆Sharon的故事，他為她寫了一曲《紅沙漠》；也有自己在旅途上的小故事：「上次去澳洲，跟localtour探魔鬼魚，司機忽然掉下一盤雞肉和調味料，叫我哋自己做廚師，最後我擔起大廚一職。（咁勇？）因我見到包Teppanyaki醬，若整出來難食，可以話係日式燒雞，結果團友食足7日無投訴！」當他去到目的地，在海中浮游，能見度低，魔鬼魚又不埋身。「到我覺得辛苦上水之際，突然一大片黑色魔鬼魚在我身下飄過，感覺好神奇！」旅行有點靠運，不保證每次柳暗花明。「像我的歌詞上說，『每個選擇都有遺憾，每個遺憾都有轉機』。」
一峰Don'tList囗
若問道於峰哥，多半得個桔。「我永遠寫唔到一百間推介食肆那類書。」因他從不着眼旅途中的消費活動。請他帶一件旅遊的紀念品，他捧來美國畫家EdwardHopper的畫冊：「我好鍾意EdwardHopper，他的作品以三十年代美國經濟大蕭條為背景，刻劃當代生活的森冷和寂寥，早前我在維也納看了一個以他做主題的畫展。」書在維也納買？「頭先買㗎，買嚟畀你影相。」
那些達人，最熱衷講那裏找冷門珍藏，峰哥半點不動心，甚至連相機也不常帶，隨身物掉得就掉。「我寫過一首歌叫《留下腳印，帶走回憶》，旅行中的一切會變成我的創作、我的文字我的歌，我覺得已經帶走了很多。」
不愛大峽谷
去年他去了冰島，今年想去印度和南美，在他心目中，想去的地方很多，要去的，卻沒那麼多。「我不贊成為去而去，有些地方如熱帶雨林或南極，我當然想去，但貿貿然去可能會破壞當地生態，不應為滿足獵奇眼光而破壞環境……太人工化的景點我抗拒，十多年前去蒙古，被帶去看蒙古包，完全是為遊客搭起來，我不喜歡。像大峽谷Skywalk，簡直是破壞自然景觀。」
戀跳沖繩
這年頭，女星出書靠拋胸多過拋書包，再喺旺角開個簽名會引毒男，人氣漲賣書多，功德圓滿。但置身水清沙幼的沖繩沙灘，吳日言（Yan）也緊守心口防線，不以水着作招徠，自己揸車在沖繩留足兩星期，純粹sell少女遊記。
「沖繩文化味濃，動靜活動皆宜，而且沖繩人好享受自己的城市，好有人情味。」問她沖繩有甚麼推介，竟然是音樂學校！「佢哋教學方式好自由，學生唔止得沖繩人，仲有沖繩以外嘅學生。我自己就推薦去學跳舞，可以按自己的程度揀課程，佢哋跳舞唔單止舞步，仲好注重形態同表情，畀人好興奮嘅感覺。」又難得地，學費比想像中平。「一個星期上兩堂，每月學費大約$4,000，仲有住宿提供，大概$7,000（不包學費）就可以住一個月。」雖然這所學校，在九十年代時，Speed、安室奈美惠當頭起的時候已出晒名，但由阿Yan這失業歌手的角度去介紹，卻有點諷刺，難怪她笑說要報名去再培訓舞技。
居酒屋80’sLiveShow
除了進修舞功，沖繩離不開的都是食買玩，阿Yan尤其欣賞餐廳的liveshow表演。「好多餐廳都有民歌表演，用傳統樂器三昧線伴奏，雖然有八十年代的老套感覺，但我欣賞佢哋忠於自己嘅文化，睇吓啲服飾同舞步都好有娛樂性。佢哋又會拉埋你一齊去玩敲擊樂，跳簡單嘅舞，同食客有交流，唔怪得日本人咁鍾意去居酒屋！」至於shopping，阿Yan就推薦國際通，「國際通雖然手信店多，但橫街內有唔少localdesignershop，未必係大牌子，但設計夠潮，好啱香港人。」唔知早前冷待阿Yan的Juno，有無興趣買番本書跟住去朝聖？
阿YanDoList囗
自駕遊好方便
在沖繩租車好方便，輸入電話號碼就可用GPS導航，不過日本小路多，一不留神好易兜錯路。
必買海鹽
沖繩除了苦瓜、水雲，天然的海鹽都好出名，入口不會一味死鹹，不妨買返香港做手信。