白鴿黨立會新丁甘乃威浮沉多年，終於憑雷曼事件打響名堂，總算冇失禮中西區街坊。佢噚日回顧過去一年工作，坦言進入立法會，其中一個目標就係要讓外界知道區佬一樣好打得，不遜於政治明星，佢自覺近大半年將勤補拙，工作基本達標，反而新任副局政助物非所值，環境局副局長潘潔應該炒魷。
放完暑假，甘威有新目標，就係想加入帳委會睇實政府盤數。帳委會慣例由各黨派協調下派員加入，目前白鴿黨有鄭家富做代表，一旦甘威加入，意味阿富要起身。甘威強調並非要爭上位，是否可取代阿富最終由黨團定奪。黨內人士稱阿富想留多啲時間照顧家庭，故有意退下畀兄弟上位。