納入愛國社團旅港福建商會旗下嘅臻美黃乾亨學校，噚日終於拍板改名為福建中學附屬學校，臻美黃乾亨成為歷史。中國人最棹忌改壞名，八方聽聞旅港福建商會考慮新校名時步步為營，雖然唔使搵玄學家指點迷津，但亦不敢掉以輕心。
一般辦學團體都會冠名學校，不過旅港福建商會卻無此念頭，事關唔知係巧合定其他莫名因素，近年殺校嘅小學，咁蹺唔少都係以社團、家族命名，臻美黃乾亨難逃厄運，北角街坊會陳維周夫人紀念學校今年就跌入殺校名單，中西區新會商會學校徘徊被殺邊緣。前車可鑑，旅港福建商會梗係唔想步後塵啦。
擺明一條龍有着數
觀塘福建中學校長林建華話，商會冇冠名新校名稱同殺校潮無關，「冇諗過咁負面。」而且佢哋係直資，唔受殺校限制，話雖如此，收唔到學生下場都係一樣啫。新校名叫福建中學附屬學校，跟足傳統名校潮流，拔萃男書院間小學叫附屬小學，聖保羅男女中學原來嘅小學部，都改名叫附屬小學，既然中學係名校，附屬小學擺明一條龍，實有着數。