猶抱琵琶好一段時間嘅陳德霖，噚日喺政府總部舉行簡陋記者會鬼祟登場，10月接替任總出掌金管局。陳德霖重返國金，意味香港金融體系進入陳氏年代，八方咁講冇誇張，因為全港市民副身家外滙基金，由陳德霖打骰嘅金管局負責投資，大家放喺銀行嘅錢，亦由佢監管；而大部份打工仔出糧後唔見一橛要供強積金，則由陳太唐芷青睇實，事關陳太係強積金管理局行政總監，即係香港人嘅錢由兩人公一份、婆一份管實晒。
陳德霖稱冇利益衝突
兩公婆分踞兩大金融監管機構高層，一在國金指點江山，一在環貿運籌帷幄，固之然係一件美事，不過亦有人認為可能有利益衝突，金融服務界議員詹培忠就建議唐芷青辭工，以免被人覺得兩公婆「霸晒香港兩個高層職位」。陳德霖噚日被問到同太太工作上有冇利益衝突時，指金管局同積金局冇從屬關係，職務冇重叠，係兩個不同架構，兩夫婦各司其職，唔構成利益衝突。
陳總日後份人工少過任總三成二，唔捨得叫老婆返屋企相父教子都唔出奇，皆因唐芷青份人工都十分可觀，薪金、津貼連同浮薪獎金，年薪超過550萬元。唐芷青以前都係政務官，後來轉職醫管局，2000年隨許仕仁過檔積金局，04年升任行政總監，07年續約三年至出年6月底，按照陳德霖講法，怕且唐芷青未有打算做全職主婦。
投資保守只買磚頭
雖然陳氏夫婦年薪合共逾千萬元，不過投資卻相當保守，據講陳德霖冇沾手股票、基金等，獨沽一味買磚頭，除自住嘅南區豪宅，仲有幾個愉景灣單位收租，喺深圳都有層樓，方便去中山打波時落腳。
唐芷青同老公一樣咁低調，冇乜公職在身，因為細個時做過女童軍，所以獲邀做女童軍總會副會長。熟識佢哋嘅人話兩公婆好恩愛，陳德霖做特首辦主任後，唐芷青曾扁嘴投訴老公份工忙到死，冇時間陪佢，上星期兩人拍拖去中環鏞記同官場老友食飯，飯局後十指緊扣離開，好鬼煙韌。
mailto:[email protected]