又繼續同大家講同阿鳳嘅新加坡梳乎行啦。呢次最令黃師傅開眼界嘅，唔係連貫幾期商場，行極唔完嘅新達城，而係驚嘆人哋交通系統設計得真係好好。經高速公路落番旺區，夜晚黃金時間都只係少少塞車。新加坡比香港細，人口亦比香港少，但最旺只有烏節路同附近嘅新達城，所有人同車幾乎集中晒喺度，但交通依然井井有條，唔似旺角銅鑼灣咁咬牙切齒打晒交，國民教育同電子道路收費，同樣應記一功。
但最叫黃師傅忍唔住停步猛望嘅，係路邊一個車位指示牌，話畀大家知邊個商場仲有位，睇完數字嚇一跳，夜晚八點幾，出街Wet嘅車應已盡數出籠，但SuntecCity居然仲有過千車位，計埋同區幾個主要蒲點，總計仲剩成三千車位，真係唔憂無位泊。難怪咁旺嘅景點，一樣唔會出現周街停車泊車阻路嘅情形，邊度多位又一目了然，香港政府值得學啦。（大話星遊之二）
文：黃師傅