少吃多滋味，可惜好多人都貪吃，壞肚皮外仲危害生態。港人嗜吃藍鰭吞拿魚，其實呢種魚已處瀕危狀況，世界自然基金會批評港人呢方面保育意識相對較低，有食肆更以競投藍鰭吞拿魚王做宣傳噱頭，該會香港分會海洋項目主管馬澤濤博士（Dr.GuillermoMoreno）話，「藍鰭吞拿近年喺香港被廣泛推廣為新一代潮流美食，實在可悲。」
該會研究又顯示，如果繼續濫捕，地中海具繁殖能力嘅成年藍鰭吞拿將於2012年絕迹，因此呼籲本地飲食業承諾停止供應藍鰭吞拿，幾家大飲食機構響應，馬哥孛羅香港酒店、PretaManger及香港遊艇會承諾停止供應，靚仔廚師JackyYu亦話唔會食同埋推廣藍鰭吞拿，佢間私房菜「囍宴」亦唔會供應。