黃貫中（Paul）日前公開發表棒棒堂專業咪嘴論後，即被棒迷要求道歉，有fans更聲言會炸爆佢個blog，但Paul就話隨便炸，仲呼籲棒迷唔好太激進，估唔到風波越鬧越大，演變成一場轟烈嘅網上大戰。
Paul掃個唱戰衣
到噚日為止，Paul嘅網誌就棒棒堂事件回應人數已超過4,700個，不過亦有大批網民撐Paul，仲發起反擊戰轟炸棒棒堂同黑澀會嘅後援會，搞到論壇一度關閉，戰況慘烈。不過Paul就繼續我行我素，將於下周開紅館騷嘅佢，前日同女友朱茵拍拖去中環嘅比利時名牌AnnDemeulemeester買衫，兩人各有斬獲但各自畀錢，Paul仲話算係揀演唱會戰衣，睇嚟佢嘅心情都唔錯。
其實除咗Paul之外，李亞男同金剛日前主持TVB8節目《娛樂最前線》時，亦都因為以棒棒堂被發現咪嘴作為笑柄而被fans圍剿。由於金剛喺節目中演繹較誇，佢個blog噚日已收到接近5,000個回應，李亞男就有700幾個，加埋Paul同其他討論區嘅回應，講緊係過萬人次研討呢件事，迴響認真大。
李亞男寫道歉信
李亞男噚日就話都知道俾fans鬧，佢話當日只係跟稿讀，諗唔到fans咁大反應，佢話：「之前我喺個blog度寫咗篇嘢，就呢件事道歉，但第日俾公司delete咗，因為公司覺得我冇做錯，唔需要道歉，惟有下次盡量唔講負面嘢，用正面方法處理啦。」