人非草木，就算前威爾斯國腳赫臣喺球員時代做過唔少瘋狂事，只要知道佢癌病纏身，性命危在旦夕，相信人人都會為佢送上摯誠祝福。好似抗癌後重生、正參加緊環法單車賽嘅岩士唐，就希望呢位喺球場上唔服輸、打不死嘅鐵漢，唔會屈服於病魔之下，為佢加油！
岩士唐︰希望佢撐落去
我求大俠早幾日提過，之前已經證實患睾丸癌嘅赫臣，原來癌細胞已擴散到腦部，雖然佢口口聲聲有信心由球場鬥士化身為抗癌勇士，但情況冇想像咁樂觀，前日佢喺威爾斯南部一間醫院接受腦部手術後，情況仍然危殆。點解？因為癌細胞原來又擴散到肺部，真係一波未平、一波又起，呢刻佢仲喺深切治療部同死神搏鬥。
自從病重消息傳出後，赫臣收到好多嚟自四方八面嘅慰問，佢家人日前發表聲明，話全家都希望可以幫佢度過難關。美國傳奇抗癌鬥士岩士唐亦曾患睾丸癌，癌細胞一樣擴散到身體各部份，後嚟打勝仗康復；佢知赫臣出事後，就算鬥緊環法，依然公開撐赫臣：「我個心同赫臣連住，希望佢堅強撐落去，希望佢知道好多人喺佢身邊支持佢，加油！」
硬朗見稱曾踢人頭
34歲嘅赫臣球員時代效力過阿仙奴、韋斯咸、溫布頓（米爾頓凱恩斯前身）、高雲地利同些路迪等球隊，到舊年喺西布朗退休；咁多年佢都以硬朗見稱，周不時同人「埋牙」。至於佢效力「槌仔幫」時，曾經喺練習期間同以色列國腳比高域斯發生衝突，一腳踢中人個頭，都幾狼死。
佢又試過背妻偷食，私德都有問題。不過我求大俠近年印象最深，係佢未完全禿頭時曾拍織髮廣告。講番佢97年被雲格棄用，難得之後踢咁多隊波都叫站得住腳；喺威爾斯國家隊上陣次數亦超過50次，咁嘅硬骨頭、硬漢子，而且得34歲，如果咁就俾病魔奪走寶貴生命，未免可惜。希望佢得「單車王」聲援，撐得住啦！
赫臣球壇足迹
阿仙奴（95-97）、韋斯咸（97-99）、溫布頓（99-01）（米爾頓凱恩斯前身）、高雲地利（01）、些路迪（01-06）、西布朗（06-08）（只列部份）
話你知：洛卡素癌病早逝
唔知大家仲記唔記得邊個係洛卡素？同赫臣一樣，佢都踢過阿仙奴，但喺01年3月31日因非霍奇金淋巴瘤而與世長辭，去世時只得33歲。
曾代表英格蘭國家隊14次嘅洛卡素，係阿仙奴青訓出身，仲喺1989年同埋91年幫兵工廠攞過聯賽錦標。92年離開阿仙奴後，佢踢過列斯聯、車路士同埋曼城等球會，但發展麻麻，仲喺99年12月因傷退休，當時佢只得32歲。01年2月證實佢患有非霍奇金淋巴瘤，呢種癌症專門侵襲免疫系統，死亡率高；佢接受化療後病情冇好轉，結果喺個多月之後離逝。