七月十日本欄寫〈學生日少〉，讀者徐來電郵抽秤，指今年升中一之學生，應該係九七年出生嘅。徐先生講得啱，於是左丁山翻查過往十四年之香港出生人數與出生率，發覺○三年係一個分水嶺，該年出生人數只有47,687人，平均每個月不夠四千，唔怪得當時之產科醫生叫苦連天。但自○四年開始，香港出生率持續上升，猜想係與自由行有關，內地產婦大量來港之故。
睇番出生數字，一九九五年有68,375人，一路下降至○三年見底，○四年回升，有48,914人，一路增加到○八年之78,751人，今年○九年頭四個月有26,636人，全年可能高達八萬，創十五年新高，而粗出生率（crudebirthrate）亦由一九九五年之1.12%下滑到○三年之0.69%，再反彈到○八年之1.13%。
純睇出生數字，學校應該好高興，學生每年會持續增加吖嘛，不過事先要捱過一段鹹苦時期先。今年升中一嘅學生，絕大部份在一九九七年出生，該年出生人數有60,379，但參加派位學生有六萬八，多出七千七人或12.6%。九八年出生人數有53,356，九九年50,513，○○年有53,720，○一年有49,144，○二年有48,119，○三年有47,687，即係話由二○一○年起，中一學生即使按出生人數加大12.6%，仍然按年遞減至二○一五年陷於低谷為止，比二○○九年減少萬二至萬五人；未來七年，中學會受到極大之殺校壓力，對教育局嚟講，二○一六年及以後，學生是否又按年遞升而增加學校數目呢？認真傷腦筋。○八年出生之七萬八千七百個嬰兒，是否在二○二○年全部都進入本地幼稚園？如果係嘅話，已經關門嘅幼稚園不妨準備在二○一一年重開。
對出版教科書嘅書商嚟講，亦係頭痛，未來七年中學生人數不斷遞減，但小學生開始增加，正是進退兩難，資源調配方面，傷腦筋之至，見到咁嘅出生趨勢，最開心嘅就係私家醫院與產科醫生，然後係兒科醫生嘞！