全球財經市場矚目嘅中國第二季經濟數據，噚日正式由國家統計局公佈，增幅達7.9%，高過市場預期，唔少證券大行要紛紛調升對中國經濟全年預測，以至對中國企業嘅盈利預測，係股票市場中屬於一個相當敏感嘅數字。之不過，呢個咁重要嘅數據，就懷疑被提早外洩，北京《京華時報》噚日就早於數據正式公佈前見報，引述一位權威人士報道咗7.9%呢個數字。
近排澳洲力拓被指涉及竊取國家機密，路透社記者噚日喺記者會上，就向統計局發言人李曉超質詢，問有報紙咁樣報道算唔算違反國家安全或機密法？係咪要展開調查？李曉超就話，非常關注呢個消息發佈後產生嘅影響，話會按有關規定同程序進行調查。
其實呢啲數據提早被傳媒披露並非新鮮事，但近排風頭火勢，唔知會唔會有下文嘞。