花旗股市前晚勁升，帶動港股噚日繼續炒上，不過累積升幅大，股民入市嘅態度比較審慎，恒指喺18700已經冇力再上，最後以18361收市，升幅收窄至103點。
不過，港股嘅氣氛明顯好轉，恒指回試支持位之後，應該可以繼續炒上，恒指要升破19000關，一定要大隻佬幫手，所以要留意大價股，地產股後市睇好，但要睇位買，六行三保都可留意。
滙控C輪17678：滙控（005）昨收66.85元，升1.9%。股價早幾日仲喺61元水平，轉過頭已升番上50日線樓上，呢轉炒上有機試75元關，可以喺65至67元之間收集C輪17678。
隻輪現價12.1仙，2010年6月14日到期，行使價61.50元，溢價10.1%，引伸波幅43.9%，槓桿率5.5倍（有效3.4倍），正股升上75元，17678睇17.7仙，正股跌穿63元，就沽咗隻輪止蝕。
俊樺