立法會泛民主派每逢星期五都召開飯盒會論政，建制派陣營都不甘寂寞，噚日喺民建聯同金勞詹等人主動安排下，邀請其他建制派議員約30人喺中環上海總會開餐，食慣飯盒嘅23位泛民主派一律冇份。
上海總會係真正名人飯堂，六叔係永遠榮譽會長之一，老董係常客，燻蛋、火瞳雞燉翅同八寶飯都好出名。噚晚7點鐘左右，議員陸續到場，葉劉同埋女兒榮欣打孖上，可能係帶佢認識吓一班自己人，有利日後從政。
葉國謙：唔係分化
呢個飯局冇預泛民，立法會主席曾鈺成則礙於「角色」而不獲邀，因此有人揣測「鴻門宴」目的。民建聯黨團召集人葉國謙笑稱唔係玩分化，只係幾位建制派議員有次碰頭，有人提出不如搞次聚餐，民建聯先參與「協辦」，大家坐埋純粹傾偈；至於唔請泛民，阿謙話泛民飯盒會亦係小圈子坐埋，建制派食飯亦冇必要叫齊所有人。
金勞詹堅稱客隨主便，所以唔在意是否有泛民在席，況且大家都係風花雪月，自己只求飲兩杯開心吓啫。