葉翠翠和陳自瑤（Yoyo）早前到廣東德慶盤龍峽拍無綫旅遊特輯，並擔任當地的「薰衣草天使」比賽嘉賓評判，其中兩女奉旨以性感泳衣上陣，大玩水戰遊戲力敵眾參賽者。而度假村老闆對翠翠甚有好感，頻設飯局與她見面。
葉翠翠、陳自瑤、胡杏兒、洪天明和黃德斌早前到廣東德慶盤龍峽拍無綫旅遊特輯，在節目中翠翠和Yoyo與20位天使佳麗大玩水上障礙賽，在碧波蕩漾的泳池中，由兩大猛男洪天明和黃德斌負責整蠱各人，務求令眾佳麗跌落水。
離港大解放
拍攝期間，度假村的老闆對翠翠十分殷勤，有指老闆對她特別有好感，因此每當翠翠在場，甚少應酬的老闆也必定現身，翠翠說：「我唔覺喎，有幾次食飯老闆都喺度，同佢都有傾偈，我哋冇單獨約會喎。其實係啲工作人員講笑啫，話我喺度老闆先嚟，成日俾人咁取笑唔好當真呀。」她又謂如果在香港，她一定拒絕穿泳衣，因為怕被人偷影，她說：「喺香港有無形壓力，仲有恐懼症㖭，可能我成日俾人跟，家出街要小心啲，所以我好少同異性朋友出街，費事惹麻煩。」
Yoyo三點式
Yoyo今次自備兩套泳衣迎戰，當她示範玩水上遊戲時，因失平衡而跌落水，她說：「雖然天氣熱，但係要長期浸喺水都有啲凍，不過浸溫泉就好啲，因為啲水暖啲，今次要着三點式拍嘢都冇所謂，因為玩水上活動，而且三點式靚啲。」Yoyo又帶點羨慕表示，是次選出兩位天使代表，她們將在該度假村工作3個月，每周人工有2萬元人民幣，做滿3個月有24萬元收入，難怪她形容為絕世好工。
採訪：陳寶明
