行將退休嘅特區金融「沙皇」任志剛，噚晚代表佢服務咗16年嘅金管局，接受《Euromoney》頒發嘅「金融市場傑出貢獻獎」。臨別秋波，任總喺晚宴致辭，講到本港金融基建重要性時，忽然話鋒一轉，表揚傳媒多年來對本地金融市場發展嘅默默貢獻，佢仲特別向跑財經新聞嘅老記致敬，盛讚佢哋嘅工作熱誠同質素。
97曾獲最佳中央銀行家獎
講開《Euromoney》頒獎畀任總，大家應該唔會陌生，仲記得97年香港回歸，適逢首次主辦世銀同IMF年會，《Euromoney》就頒咗個最佳中央銀行家大獎畀佢，當年任總風頭一時無兩。
香港係國際金融中心同環球傳媒樞紐，任志剛形容，香港財經傳媒「非常蓬勃」，新聞界喺金融市場發展，亦擔當關鍵角色。任總又特別點出，本地「從事財經新聞的朋友的質素和工作熱誠，是我16年來擔當金融管理專員一直非常欣賞的」。
自稱是傳媒同業
98年開始，任總透過每周專欄《觀點》發表文章，暢論金融形勢及扮演市場警察，已儼然「成為多份報章的專欄作家」，因此佢話老實唔客氣，直接用「同業來稱呼傳媒朋友」。
李華華
mailto:[email protected]