【09書展 不甘示弱】網民群組要踢o靚模出書展，34E的Lavina和32B的Rainbow慘成犧牲品，但她們抱大無畏精神，昨日更相約到會展踩場。Lavina表示願意接受反o靚模群組主腦之一的Isaac道歉，下周書展她更會進場買書，但卻無意掃寫真集，反而捧Stephy（鄧麗欣）場買她的首本小說。
o靚模推出噴血寫真，誓要殺入下周開幕的書展，但網民近日在網上發起大聯盟要o靚模滾出書展，o靚模Lavina（鍾蕙芝）、Rainbow（胡心諾）和Monique（周凱盈）等上月底搶攻推出的《夏之盛放》成眾矢之的，出版社也縮沙取消一切書展宣傳。
欣賞Stephy文筆
雖然未能到書展答謝讀者，34E的Lavina昨日與Rainbow及Monique也不氣餒，三人更率先到灣仔會展踩場，更不時在鏡頭前狂sell自己的寫真集，Lavina指o靚模無罪，她們會以平常心面對反對聲音，下周更會相約行書展。
對於反o靚模群組主腦之一的18歲英國留學生Isaac（張振海）的致歉，Lavina說：「每個人都可以表達唔同意見，但都要顧及別人嘅感受，禮貌上我係會接受別人嘅道歉。o靚模都係一個行業，係外界畀我哋嘅稱呼。」Lavina表示不用到書展做宣傳，她樂得輕鬆逛書展，她說：「我會入去買啲自己鍾意嘅書，綜觀藝人出書，我一定會買Stephy（鄧麗欣）嗰本《陪著我走》，我好欣賞佢嘅文筆。」
問Lavina誰是她最欣賞的作家？她說：「我情有獨鍾科幻小說，最鍾意衛斯理，我覺得倪匡嘅文筆好好，為人又風趣幽默，有機會好想畀本書佢簽名。」Rainbow和Monique異口同聲表示力撐Angelababy的寫真集，必定會買一本收藏。
Rainbow轉讀夜校
Rainbow被爆遭玫瑰崗踢出校，她昨日直認：「我因為犯咗校規，成日請假，同校方配合唔到，但遲啲我會報番夜校就讀。」至於身為同學的Monique解釋自己是主動退學，她說：「因為工作時間唔固定，我諗夜校會配合得好啲，我已完成中四課程，出年必定會參加會考。」
採訪：比華利
攝影：陳慧安
通識比拼︰Rainbow串錯比堅尼
o靚模被指「波大無腦」，記者昨日特別把10題通識即場向Lavina和Rainbow進行大測試，結果Rainbow答對7題，險勝Lavina1分，被爆遭踢出校中四生Rainbow的英文程度一般，竟連自己經常穿的比堅尼英文bikini也串成「binkin」，而Lavina的文學常識比較低，竟然指武俠小說作家梁羽生擅寫愛情小說。
