鍾意打機，唔一定係男人專利！傅穎雖然唔係咩高手，但拎起手掣立即機迷上身，佢首試PS3版《塊魂》嗰陣，唔止識用兩粒Analog掣操作角色行動，仲學曉遊戲規則：就係先滾細，後滾大嘅道理，幾乎玩到唔停得手。
記者：陳國輝
攝影：陳盛臣
救醒昏迷國王
故事講搞笑嘅宇宙大國王，不慎撞跌一粒大行星，搞到昏迷兼喪失記憶。而遊戲主角嘅王子，於是打造咗一個巨大嘅「國王機器人」，暫代佢嘅工作，點知機器人突然發狂，將宇宙大肆破壞。為恢復原來面貌並救醒國王，王子再度展開冒險，去到唔同嘅世界將物件越滾越大，直至成功拯救宇宙上嘅小星星為止。
合作對戰出擊
玩法跟上幾代都幾相似，同樣要借助手掣上兩粒Analog操作，感覺似揸坦克車咁，仲要不斷根據任務要求，將物件由細碌到指定嘅Size！
不過今集特別加入合作形式，惡搞處係一人控制一邊Analog，正是你自己一個叻晒都冇用！假如真係夾唔啱人，不如倒過來掉轉槍頭，化友為敵玩對戰！今集首次登上PS3，變成全高清1080p顯示，講色彩，佢真係比PS2版豐富鮮艷得多，試諗當你碌起幾百樣物件，情景係幾咁壯觀！
六軸感應過關
首次踏足PS3平台，唯一可惜當然係不設Online上網對戰！不過遊戲還可利用PS3手掣嘅六軸感應去過關，舉例講你可藉唔同方向嘅搖擺或晃動，令主角一躍跳起，以方便收集高處物件或避開無謂障礙物。同時，呢一集仲加入心形道具，佢能夠於短時間內吸引四周圍嘅物件，對過關幫助一樣咁重要㗎！
Profile
主機平台：PS3
遊戲類型：動作
遊戲人數：2人
製作：NAMCOBANDAI
發行：NAMCOBANDAI
推出日期：7月23日
