都係嗰句「發達容易搵食難」，最反映今天全球所有正處於溫水裏的青蛙，雖然經過周初頭兩日變形金剛市，忽然個場好似迴光返照咁旺番晒，總之個市有錢就天然生晒。
港股市場漸變大戶樂園已屬肯定，你我唔係咁容易數到大戶手花，但係對家就起清晒你個底，散家勝算好低。朝早拍檔T先生有日路經灣仔建材街，成條街都扭開財經台聽緊股票，晏晝拍檔L公子行過中環，話戲院里鎖匙檔多咗部電腦，老細邊做生意邊炒番兩手。凡此種種足以證明香港真係一個「國際金融中心」，人人股票上身。
歸根究柢，大家明知正業難搵食，破格不務正業反而有益身心，明知5、6月份數據按年大躍進只屬理所當然。唔好忘記舊年呢個時候地震國難當前，跟住搞奧運，成個北京嘅經濟活動更加好似停頓咗，加埋年頭宏調後遺症，經濟形勢唔應該衰得去邊，假如仲衰過舊年，反而會令人大跌眼鏡。
上證指數嚴重超買
內地唔少省市嘅樓價跟舊年同期已有過之，股市亦成功收復唔少失地，雖然距離高位家鄉仍有3000點，可能要將啲國策翻炒多幾轉再催谷，但係剛剛公佈嘅FDI倒退情況，配合M1即係活期存款嘅大幅增長，令人關注資金一面倒揮軍殺入樓市股市，而官方又唔見出嚟阻止，徒令股民更變本加厲。
有否留意上證指數技術指標已反映RSI背馳及STC嚴重超買，政策可以撐得佢幾耐？國家外滙儲備上兩萬億都要歌舞昇平慶祝一番，其實錢多無出路仲大鑊。當然有總好過無，眼見以炒為本嘅高盛就賺個盤滿缽滿，正正經經貸款予中小企做生意嘅就瀕臨摺埋，更足證個世界有幾扭曲。
自從有咗自由行都唔係人人受惠，最受惠者肯定係有舖位收租嘅業主。中環華人行一個勞力士舖位都可以收1500蚊呎租，1000呎就係150萬元月租，當係平均每隻錶執番1萬蚊都要賣夠150隻，即係每日要賣5隻，但係每日見到行經門口嘅人就多，敢望埋去嘅就少。再上樓睇睇，樓上嘅生意亦唔見得容易做，麥堅時律師行剛剛先至一口氣炒咗54人，被裁者唔係卒仔而係有牌嘅律師，就算有得留低者都要減人工。睇見大行都要出此下策損兵折將自殘，話口未完，安永會計師樓又以勸退方式裁員，正經生意有幾難做，心照啦！
胡孟青