啲人成日話化妝品係偉大發明，好似喺鏡頭前明艷動人嘅無綫花旦宣萱，前日去中環逛ifc時，冇化妝嘅佢戴眼鏡、cap帽、紮馬尾，混喺人堆中完全唔起眼。當時佢一個人行超市，睇咗一輪乳酪之類嘅食品，但唔多啱胃口，最後只係買咗兩個麪包就鬆人，雖然素顏嘅佢甩晒色，但對上鏡唔抗拒，仲好親民同記者揮晒手打招呼㖭。