一舉成名嘅事旦男窮追TVB，噚日喺港台節目《千禧年代》繼續插CCTVB，佢話好多觀眾批評TVB新聞偏頗，然而新聞部話事人袁志偉卻一直匿埋冇公開解畫，只由陳志雲做代表，「其實我覺得咁已經干預緊新聞自由，你有冇見特首代律政司司長講法律嘅嘢？講新聞嘅嘢，應該搵袁志偉講。」
陳總變擋箭牌
無綫新聞小花郭詠嘉7.1遊行當日被遊行人士激到喊，事旦男澄清與佢無關，又指前線記者受壓，全因高層唔敢面對公眾，佢又批評郭詠嘉唔夠專業，「如果佢係一個專業記者點解會喊？」話雖如此，袁志偉始終冇響應事旦男號召，前晚廣管局舉行第二場免費電視台牌照中期檢討公聽會，又係陳總現身。
有女士指無綫新聞刪剪社民連三子講仆街，但電視劇卻大講特講，《十月初五的月光》中陳曼娜對白有「仆街仔」，《流金歲月》林峰打交時亦爆過一句「仆街，出嚟！」呢位女士自言好愛陳總，可能愛之深、責之切，話無綫新聞不應播出志雲訪問阿嬌，明星訪問唔應該喺新聞時段播出！