花旗股市造番好啲，港股即刻發力，兩日累升1003點，都唔好話唔勁，不過成交唔算大，暫時都係挾高挾低，未有大方向。
不過，有一樣嘢就可以肯定，就係市場嘅氣氛好咗，因為區內唔止港股升，內地A股嘅表現都好好，港股已經反覆咗一段長時間，應該係時候再展升浪，如果港交所（388）異動，可能係成交轉旺嘅啟示，伺機追入C輪短炒。
港交所C輪17140：港交所昨收121.20元，升咗3.7%，突破20日線，成交大幅增加，短線有機上試6月高位133元，破位睇140元，可以諗吓隻C輪17140。
隻輪現價18.1仙，2009年11月30日到期，行使價118.88元，溢價13%，引伸波幅59.6%，槓桿率6.7倍（有效3.9倍），正股升上140元，17140睇30.5仙，正股跌穿115元，就沽咗隻輪止蝕。
俊樺