日日三十幾度熱到爆，想食啖冬瓜消消暑。師奶廚神兼再培訓局烹飪課程導師張靜芬DoDo，最近在街市見到少有的第一代大冬瓜，興奮到跳起：「唔係成日見到，佢清甜好食好多，連家第三代溫室冬瓜都唔夠佢好食。」
甚麼是第一代冬瓜？「即係外形有成3個籃球咁大，重30斤一個的圓柱形冬瓜，表面有層白霜；第二代冬瓜即係平日最常見的長條形，無白霜、墨綠色嗰種；第三代即係表面有白霜，外形似大南瓜，扁扁肥肥的溫室冬瓜！」
DoDo三種都食過：「梗係第一代最清甜、最有冬瓜味，其次係第三代，但係貴；第二代就乜都差，但就平囉！」可惜第一代冬瓜唔係成日有，亦唔係度度有得賣，當日DoDo在旺角煙廠街街市尾檔肥妹姐姐檔口搵到，見有就即刻買來試試喇！
